..::SeaCat::..
Í lönduninni núna síðast þá héldum við að kisi væri tíndur, hann fór út um morgunninn og var úti allan daginn, um kvöldið gerðum við Mörlandarnir allsherjarleit og skriðum á alla þá staði sem okkur datt í hug að hann hefði kannski troðið sér á en hvergi var Vírus.
Rétt upp úr miðnætti skilaði svo félaginn sér, engin vissi hvar hann hafði verið og það var þangað til í morgun óráðin gáta.

Þegar ég var búin að bjóða góðan daginn í morgun spurði ég stýrimennina hvar sá fjórfætti væri, þeir sögðu að hann væri uppi á brú og hefði líklegast verið það í lönduninni líka, ég átti nú bágt með að trúa því. Þangað upp er lóðréttur stigi og langt á milli þrepa.
Jú hann fer þarna upp sögðu þeir og Alex lýsti því fyrir mér hvernig kisi hífði sig upp þrep fyrir þrep, ég átti enn bágt með að trúa þessu og sagði við stýrimennina að þeir væru að plata mig, þá segir Slava “no no this is right, this is SeaCat!!!!”.
Ekki dugði þetta til þess að ég tæki trúna svo ég ákvað að fara upp á brú og skoða þetta sjálfur, ef þetta væri rétt þá væri Vírus uppi á brú.
Þegar upp var komið rölti ég einn hring og kallaði á Vírus, en hann lét ekki sjá sig, nú var ég viss um að þeir hefðu verið að grínast í mér og hefðu náð að leika á mig.

En þegar ég var að fara niður aftur þá kom kisi mjálmandi og þáði smá klapp og klór.
Vonandi náum við mynd af því þegar hann fer þarna upp því það er örugglega merkileg sjón að fylgjast með því.

Annars er ekki mikið að frétta, við kláruðum okkur á legunni í gær og héldum til veiða seinnipartinn.

Nú er lífið um borð að komast í réttar skorður.
Mynd dagsins er af stiganum upp á brú, svo setti ég nokkrar myndir inn á myndasíðuna..

Læt þetta duga í dag.