..::Ætli þetta sé hálfnað????::..
Jæja þá er víst komið að því, X ár síðan ég kom organdi í heiminn.
Eftir minni bestu vitneskju þá fæddist ég í Sjóborg á Eskifirði 14mai 1967 og vó 18merkur.
Meira veit ég ekki um þennan merkisatburð, en ég geri fastlega ráð fyrir að það verði flaggað um allt land í tilefni dagsins.

Og svo við snúum okkur að því sem máli skiptir, við erum staddir suður í rassgati ásamt bróður Janusi, bróður Geysir var hérna líka fram á miðjan dag í dag en þá yfirgaf hann okkur blindfullur og stefndi fullum seglum í norður til Nouakchott í löndun.

Við komum hingað suður í gær og afrekaði ég það að splúndra tveim veiðarfærum þannig að Guðmundur trollgúrú skríkti eins og kát heimasæta eftir velheppnaðar mjaltir, förum ekki nánar út í mjaltirnar.
Ég taldi vissara að vera ekkert að nálgast netaspekúlantinn meðan mestu fagnaðarlætin yfir afrekum mínum gengu yfir.
Seint í gærkvöldi múruðum við svo saman við Geysi og hífðum nokkur bretti af umbúðum yfir til þeirra svo þeir gætu stappað í holuna sem þeir áttu eftir, Haddi er búin að vera í stuði undanfarið, skipið hjá honum var á nösunum eins og þefdýr í leit að æti.

Í morgun þegar ég svo drattaðist á fætur var hafflöturinn eins og heiðatjörn á góðum sumardegi, alveg ljómandi eins og Albert myndi orða það.

Þessi góðviðrisblíða hélst svo í allan dag og fjölmenntu Janusarmenn til okkar á tuðrunni í góðviðrinu, fyrst héldum við að þetta væri Senegalskur flóttamannaprammi sem væri að koma að síðunni, en svo þekktum við Svan og áttuðum okkur á því hverjir voru þarna á ferð, Steini var með þessi líka fínu sólgleraugun sem huldu að mestu á honum andlitið, ógerlegt var að átta sig á því hvað maðurinn var gamall ,) þetta var meira eins og að horfa framan á rútu með dökklitaðri framrúðu.
Arnar var eins og landkönnuður úr miðjum Amason frumskóginum, með þvílíku sveðjuna í beltisstað tilbúin að höggva sér leið.
Þeir stoppuðu hjá okkur nokkra stund en drifu sig svo yfir í Janus rétt fyrir kvöldmat, það er víst sjálftökuborð þar á sunnudögum sem ekki má missa af.
Ykkur til fróðleiks þá er hlaðborð “Sjálftökuborð” á Færeysku, mér finnst það eiginlega miklu flottara en okkar orð yfir þetta.

Í kvöld logaði svo hafflöturinn í grænu maurildi svo að öldurnar sem skipið myndaði, liðuðust lýsandi út frá skipinu í myrkrinu, þetta er ekki ósvipað glitrandi flaueli sem bylgjast út frá skipinu og ótrúlega flott að fylgjast með þessu í myrkri.

Jú og meðan ég man, hvað finnst ykkur um að Árni Jónsen sé komin inn á þing?
Ég segi nú bara eins og Reykhásinn ma ma ma ma bara skilur þetta ekki, ég er kjaftstopp yfir þessari vitleysu.

Mynd dagsins er af syni Ísmansins og Hafsteini skipstjóra á Geysi, svo eru nokkrar fleiri myndir á myndasíðunni.

Þá er þetta komið í bili.

Bið svo Guð og gæfuna að fylgjast með ykkur fyrir mig.