..::Dalvík Laugarfell::..
Jæja þá er að reyna að pota inn einhverjum línum.
Veðrið er búið að vera gott undan farna daga og hefur tíminn verið notaður til að sinna garðinum ásamt öðru slugsi.
Einar vinur minn kom til að landa rækju hérna í gær og dró ég hann heim og grillaði fyrir hann í hádeginu, það gekk stórslysalaust :), en gaskúturinn geispaði síðustu gasstununni um það leiti sem velta átti steikinni fyrsta gang og mátti ég bruna í hvelli niður í Olís og fjárfesta í nýrri áfyllingu. En svo kom þetta allt með trukki og dýfu og heppnaðist ágætlega. Sú gula var ekkert að glenna sig í gær þó veðrið hafi verið gott að öðru leiti, vantaði bara þá gulu hehe.

Eftir kvöldmatinn spennti ég svo á mig allan búnaðinn og sparkaði hjólinu í gang, var fyrst að spá í að renna í mína árlegu Siglufjarðarferð, en snéri við út við Karlsá vegna þokusudda og brunaði alveg omvent við fyrstu ákvörðun, nú var kúrsinn settur inn Eyjafjörð og hafði ég hug á að skoða aðstæður inni í Leynishólum en þangað er fyrirhugað að fara í útilegu á morgun. Fyllti ég upp af eldsneyti á Leirunesti og hélt svo áfram inn fjörð. Leynishólar voru náttúrulega alveg eins og þeir lifðu í minningunni “frábært útilegusvæði” og rúllaði ég eina ferð í gegn til að ganga úr skugga að ekkert hefði breyst. Nú var ég sem sagt staddur innst í Eyjafirði með nánast fullan tank af bensíni og þá kom ekkert annað til greina en að setja stefnuna á hálendið ;), það var þokusuddi innst í firðinum en maður keyrði upp úr þokunni og upp í sólina, Hofsjökull skartaði sínu fegursta og var mikilfenglegur þar sem sú gula baðaði hann í geislum.
Ég hélt áfram inn í Laugarfell en þar var slæðingur af fólki.
Ég rambaði fljótlega á skálavörðinn sem var hin almennilegasta og vildi allt gera til að greiða götu mína, en ég falaðist eftir því að fá að hringja sem var auðsótt mál, 200kr og frúin uppvís af því hvar ég var niðurkomin. Þar sem mývargurinn var í svörtum skýjum þá ákvað ég að stoppa stutt og fara ekki í laugina, heldur sparkaði ég í gang og hélt sömu leið til baka. Það kom mér örlítið á óvart hvað var mikil umferð þarna úpp á hálendinu en ég mætti einum 4bílum á leiðinni inn úr og eitthvað svipað á bakaleiðinni, þar á meðal einum Subaru sem virtist ekki eiga í neinum vandræðum með þetta, þetta er nú kannski ekki rétti vegurinn fyrir fjórhjóladrifna fólksbíla en lagnir bílstjórar ættu samt að komast þetta vandræðalaust.
Það var þoka þegar ég kom niður í Eyjafjörðinn aftur og smá Norðangola, eftir Akureyri var þokan svo svört að það rétt sá í næstu vegstiku, en svo greiddist aðeins úr þokunni sem var þó meira og minna alla leiðina út á Dalvík, klukkuna vantaði 20mín í eitt þegar ég stoppaði í hlaðinu heima eftir velheppnaðan kvöldrúnt, 250km akstur að baki og ég nokkuð sæll með árangurinn :).
Næst á dagskrá er það svo útilega í Leynis en þangað ætlar fjölskyldan vinir og kunningja að fjölmenn á morgun og stefnan er að eyða þar laugardeginum gista eina nótt í tjaldi og dorma svo þar á sunnudeginum ef veður verður hagstætt.

Ég lagfærði aðeins blogglinkana á heimasíðunni, sumir duttu úr en eitthvað bættist við ;).

Læt þetta nægja í bili.
Bið Guð og gæfuna að fylgja ykkur um vandrataða villustíga lífsins, og gerið ekkert sem ég myndi ekki gera hehe....................