..::Lipurtá með kláðamaur::..

Það er ekki hægt að segja annað en að dollan hafi verið frelsinu fengin eftir að hafa þurft að liggja þæg og góð við bryggjuna í tvo daga, hún leifði okkur alveg að finna það að hún ætti inni smá hreyfingu og ólmaðist eins hún væri með kláðamaur um leið og hún slapp út fyrir St.Francis. Það var mikil gleðin fyrir dolluna að sleppa út úr lygnum flóanum, mér finnst að hún megi spara aðeins við sig lipurðina, en hún ræður bara ekki við þetta blessunin:).

Það er ekki tekið út með sældinni að vera vélaStrumpur á þessari dollu! Seinnipartinn í gær þegar Strumpurinn var að huga að nýlæknuðu frystikerfinu neitaði önnur frystipressan að fara af stað, hún gaf sig ekki með það fyrr en eftir hádegi í dag. Á þeim tímapunkti var veslings Strumpurinn orðin rauðeygður og vonleysissvipur geislaði af þreytulegri ásjónu hans, vandamálið virðist hafa legið í einhverjum vír sem dollan var búin að skaka og hrista úr sambandi í hamingjulátunum yfir því að vera sloppin frá bryggju.

En þessu er öllum þessum látum er tekið með jafnaðargeði í dollunni, það er orðið fátt sem kemur okkur á óvart .

Dælan fína sem þeir félagar voru búnir að reina sem mest við í síðasta túr, var sett í endurhæfingu í St.Johns og kemur ekki fyrr en í næstu veiðiferð. Það mætti hér mikill spekingur sem þekkti gripinn af fyrri viðureign, hann skoðaði dælugarminn gaumgæfilega hlustaði hana alla og strauk, dæmdi hana svo úr leik í bili. Sem sagt það þíðir víst lítið að vera með einhverjar hrossalækningar þegar sjúkdómurinn er komin á þetta alvarlegt stig.

Það er nammidagur hjá okkur í dag og eru tveir opnir nammidunkar í brúnni, annar inniheldur myntur en hinn marglita hlaup áðnamaðka, sælgætisgrísinn er ánægður með daginn og mætir reglulega í brúnna til að gera þessu skil. Þeir renna ljúft niður áðnamaðkarnir og hef ég ekki trú á öðru en það verði búið að hugga sig með innihaldinu úr þeim dalli fljótlega :).

Jæja ætli þetta verði ekki að duga ykkur í dag :).

Bið Guð almáttugan hans eingetna son og alla þeirra fylgisveina að vaka yfir ykkur. Leiða ykkur burt frá allri villu og færa ykkur allan þann kærleika og hamingju sem þið getið tekið á móti.


<º))))><.•´¯`•. Hörður .•´¯`•.><((((º>

Ummæli

Vinsælar færslur af þessu bloggi