Fljótlega þurfti svo Rúnar að fara svo við Maggi vorum eftir, við tókum smá sprett á ísnum á tjörninni og svo var stefnan sett á Svarfaðardalsána sem virtist vera nokkuð góð frá Árgerðisbrú og niður að hitaveiturörinu, en nýlega var búið að keyra þetta þvers og kruss á bíl. Við tókum nokkur rennsli þarna og það var þvílíkt gott að prjóna á ánni.
En þetta var orðið ágætt og Maggi lagði af stað upp á flæðarnar en mér leist ekki nógu vel á það og ákvað að fara til baka. Ég var rétt komin af stað þegar ísinn gaf sig og ég lenti á svartakaf hehe, en sem betur fer var þetta ekki mjög djúpt kannski klofdjúpt. Þegar ég var búin að reisa hjólið upp þá kom Maggi og hjálpaði mér að koma hjólinu upp á ísinn, það gekk ágætlega en djö.... voru fæturnir á mér þungir þegar ég var að brölta upp á ísskörina.

Nú var næst að koma hjólinu í gang, það var nú ekki alveg á því enda sjálfsagt búið að súpa örlítið af vatni inn á sig, en eftir að ég var búin að slíta lofthreinsarann af og ausa ísmolum og vatni úr loftsíuhúsinu muldraði hjólið í gang. Þá var bara að vinda úr loftsíunni og reyna að komast til baka, það voru smá gangtruflanir til að byrja með og ég lenti smá niður úr en slapp við dýfu og hafði mig upp á þurrt.
Eftir þessa svaðilför fór ég smá stund á tjörnina til að ná mestu hæsinni úr hjólinu og fljótlega var það farið að mala sem aldrei fyrr.
Þegar heim var komið og ég búin að draga af mér rennblautar buxur og stígvél fór ég í að skipta um olíu á hjólinu.