..::Nammi namm!!::..
Nú verður að taka þetta með trukki og dýfu því ég nenni ekki að eyða miklum tíma í þetta blogg núna.
Dagurinn hefur verið öðrum líkur nema að því leiti að það hefur verið mun meiri traffík í dag en undanfarið.
Allt fullt af skipum í kring um okkur í morgun þegar ég stakk hausnum upp í brú, allar stærðir og gerðir af togskipum, sumir að draga tvö troll á bómum á meðan aðrir pungar bisuðust áfram á rólegri ferð.
Við erum að draga á 5-6sml ferð og það hentar ekki alltaf að vera mikið innan um þessa smápunga sem ekkert komast áfram, en þeir eiga sinn tilverurétt eins og við svo það er ekki mikið við því að segja þótt þeir séu að reyna á sömu slóð og við, það hefur gengið blessunarlega að eiga samleið með þessum pungum hingað til, hvað sem svo framtíðin ber í skauti sér ;).

Annars einkenndist dagurinn brasi, en það verður víst að taka þá daga líka og allt fer þetta í reynslubankann sem er nánast vaxtalaus eins og í bankakerfinu heima, þ.e.a.s innlögnin. En ég veit ekki hvað skal segja um úttektina, hún er sennilega á mun viðráðanlegri vöxtum en útlán úr Íslenska bankakerfinu.

Mynd dagsins er af konfektkassa sem Rauðnefur kom með alla leið frá Rússlandi, ekki það hollasta en agalega gott, maður tekur svo bara á þessu nammiáti seinna ;), “á morgun segir sá lati :):)”.

Þá er þetta komið í dag.
Munið svo eftir smáfuglunum, ég held að þeir séu svangir greyin í þessu hretviðri sem er hjá ykkur á klakanum.