Eitthvad út í buskann...

..::Eins og flís í r...::.. Hef verið ultra latur við að blogga enda ekki mikið að segja, hér gengur allt sinn vanagang og hitinn er mátulegur hehe, það er allt búið að vera á fullu í flísalögninni og það var gaman að koma um borð og sjá hvað hafði gerst í þeim málum meðan við vorum í fríinu. Þetta kemur alveg dillandi vel út. Að öðru leiti er svo sem ekki mikið að frétta. Mokaði einhverjum flísamyndum inn á myndasíðuna.......... Bið og vona að sá sem öllu ræður og stjórnar verði sálum okkar náðugur um ókomna framtíð ;).

..::Gleðilega Páska::.. Nú þarf maður ekki lengur að láta sér hlakka til að éta páskaeggið því það er komið ofan í maga á okkur félögunum ;), annars kom það skemmtilega á óvart að Kristján kom færandi hendi í hádeginu og færði okkur öllum páskaegg svo engin fór í páskaköttinn. Annars finnst mér nú alltaf málshættirnir það skemmtilegasta við þessa súkkulaðihefð. Ég fékk tvo málshætti í dag en utan um þá voru súkkulaðiegg sem eru nú uppétin hehe. Barnið vex en brókin ekki Að ósi skal á stemma Reynir Sig fékk Engin man öll sín orð sjálfur Gummi Sævars fékk Sá skal friðinn ei brjóta, sem friðarins vill njóta Halli vélstjóri fékk Holdið er torvelt að temja Og Kristján Jak fékk Sinn brest láir hver öðrum mest Þannig leit þetta út.......... Mynd dagsins er af stærra egginu mínu 3mínútum eftir að það var byrjað á því :). Látum þetta duga í dag. Bið páskagyðjuna að vera ykkur innan handa í eggjaátinu........og munið að það má alltaf taka sig á seinna hehe.

..::Inmobil gyðingar::.. Jæja þá erum við búnir að afgreiða fyrri fraktdolluna, Sjóla og erum að múra við seinni fraktdolluna, þetta gengur allt sinn vanagang hérna í suðurhöfum, sipp og hoy eins og sungið er í laginu góða hehe. Í dag sá ég rukkun fyrir Inmobil reikninginn minn og ákvað í framhaldinu að leggja hann af, djö.... rán sem þetta er en við því er víst lítið að gera, en þetta er alveg í takt við annað sem R....miðun kemur nálægt, þeir hafa alltaf verið duglegir við að skrifa reikninga og því best að eiga sem minnst viðskipti við þá. Ég opnaði mér nýtt tölvupóstfang sem er hordurholm@gmail.com og kem til með að nota það á sjónum, ég er búin að loka inmobil netfanginu svo það þíðir ekkert að senda á það. Þá er þetta komið í bili. Bið heilladísirnar að líta við hjá ykkur.....

..::Páskaeggið bíður::.. Föstudagurinn langi, það er víst dagurinn í dag, einhvertímann í fyrndinni kölluðum við þennan dag flöskudaginn langa en það var meðan maður var upp á sitt besta í glasalyftingunum hehe. Við liggjum enn á legunni og löndum, vonandi klárum við fyrra skipið í kvöld og þá er einhver sletta eftir í annað skip sem er hérna á svæðinu. Í gær gerðum við Gummi okkur dagamun og fórum í heimsóknir í skipin sem hérna lágu á legunni, það var gaman að hitta gamla kunningja og sjá eitthvað nýtt. Annars hefur maður lítið annað gert en að éta og ég sem ætlaði að taka mig eitthvað á í þeim málum þegar ég kæmi um borð, svona svo ég passaði í fermingarfötin þegar ég kæmi heim hehe, en jakkafötin mín ganga undir þessu nafni enda ákaflega lítið notuð sem betur fer, það er klæðnaður sem mér líður alltaf frekar illa í. Vírus hefur það ágætt og lætur ekki mikið raska ró sinni, hann sefur étur og kemur og lætur klóra sér annað slagið. Nú bíður maður bara eftir því að geta opnað páskaegg...

..::Ferðalag og fjölgun í ættinni::.. Jæja þá er maður komin aftur um borð og ferðin út var hin viðburðarríkasta. Hjördís pikkaði mig upp á Reykjavíkurvelli og renndum við aðeins við á skrifstofunni í Hafnarfirði áður en við kíktum á Hönnu Dóru Gunna og Hauk en þau voru nýflutt yfir í Hafnarfjörð og voru að koma sér fyrir þar. Við borðuðum plokkfisk hjá þeim áður en við fórum yfir í Garð til mömmu og pabba. Hanna Dóra hin sprækasta að sjá og ekkert virtist í spilunum að ég fengi að sjá litlu frænku áður en ég færi ;(. Við Hjördís rúlluðum svo yfir í Garð þar sem mamma og pabbi tóku á móti okkur, við áttum ágætt kvöld þar sem ýmislegt var spjallað, um tólfleitið fór ég svo að sofa enda átti að taka næsta dag snemma og vakna korter yfir sex. En litla frænka ætlaði ekki að missa af því að heilsa upp á frænda áður en hann færi svo hún dreif sig í heiminn með trukki og dýfu, klukkan 01:20 hringdi Gunni og þá var daman mætt í heiminn :), við drifum okkur á fætur og brunuðum inní Hafnarfjörð ...

..::Tími komin á Jólakortin ;)::.. Það hefur bara verið letidagur hjá mér í dag, ég var búin að ákveða að hjóla eitthvað í dag en svo nennti ég því ekki þegar til kom. Sjaldan hef ég verið svona værukær með að taka mig til á sjóinn en ég kveð Dallas á morgun eftir hádegi svo það er nógur tími að henda einhverju í tösku í fyrramálið. Frúin var með hamborgarahrygg með brúnuðum og alles í kvöld og svo var lítið páskaegg í eftirrétt, málshátturinn minn var “Betra er brjóstvit en bókvit.”. Fyrst þetta var svona jólaleg máltíð hjá okkur þá dreif ég mig í að lesa jólakortin sem við fengum síðustu jól, ekki seinna vænna áður en ég stekk aftur burt, það var ekki svo galið að renna yfir kortin þótt hér sé vor í lofti ;). Annars er ekki neitt í fréttum............. Bið allar góðar vættir að fylgja ykkur.

..::Stiginn komin upp:::. Jæja þá er stiginn komin upp, Kibbi mætti seinnipartinn í gær og rusluðum við stiganum upp í gærkvöldi, þetta var orðið að mestu klárt upp úr miðnætti ;). Í dag kláraði ég svo að setja upp handriðið og smá fíniseringar sem átti eftir að klára. Það er þungu fargi af mér létt við verklok á þessum stiga hehe. En sjálfsagt verður húsfúin einhverja daga að ná mesta rykinu burt en það virðist hafa sest um allt í viðureign minni við steinsteipuna. Henti inn myndum af nýjasta afrekinu. Guð gefi ykkur góða helgi.................

..::Smá þokast::.. Þetta smá þokast í rétta átt með stigann, nú er gatið nánast orðið klárt, við Gummi steiptum í kring um mótið í gær og ég reif svo mátann úr í morgun. Þetta lítur bara þokkalega út og er ég að vonast til að geta klambrað stiganum upp um helgina :), vonum bara að það hafist. Setti inn nokkrar myndir af síðustu afrekum............................. læt þetta nægja núna.

..::Dómurinn er fallinn::.. Þetta kallaði nágranni minn yfir til mín þegar ég var að koma heim í gærkvöldi, ég sagði náttúrulega ha og vissi ekkert um hvað hann var að tala. En þá var hann að meina að það væri komin tími á brottför hjá honum ;), hann er líka að róa úti í heimi svo að ég er ekki einn í þessu í götunni :). En minn dómur var löngu fallinn og það er brottför frá Dalvík 2apríl. En þetta er allt í svo fínu kerfi hjá mínu kompaníi að dómarnir eru gefnir út í upphafi árs svo maður veit nokk hvernig þetta verður.

En af framkvæmdum, ég drattaðist í að mála allan bílskúrinn í gær þ.e.a.s veggina og ég verð að viðurkenna að það var ekki vanþörf á því, þetta er bara eins og nýr skúr eftir yfirhalninguna, það er alveg ótrúleg breyting á eftir málun. Nú og hringstiginn er mættur á svæðið þótt ég sé ekki búin að taka hann heim, þetta er 200kg kassi og maður hleypur ekki neitt með hann á bakinu, svo að ég bíð með að sækja hann á afgreiðsluna þangað til að ég er tilbúin að taka við honum. Ekki var nú dýrt að flytja hann norður með Samskip 3700kr en en það kostaði 4800kr að flytja hann frá afgreiðslu Stigalagersins að afgreiðslu Samskips fyrir sunnan, þannig að smá bíltúr innan Reykjavíkur varð dýrari en að flytja stigann frá Reykjavík til Dalvíkur, en þetta er Ísland í dag og ekki alltaf sem maður skilur hvaða forsendur eru fyrir verðlagningunni. Nú bíð ég bara eftir mátanum sem ég þarf í stigagatið til að gera það kringlótt, en ég þarf eitthvað að brjóta út úr gatinu og steypa svo eitthvað. Mátinn verð...

..::Framkvæmdagleðin ha humm::.. Ég hef verið mjög latur að blogga undanfarið og ýmislegt er búið að bardúsa og gera sem ekki kemur fram hérna vegna alsheimer light sem mig hrjáir :). Það helsta sem undanfarið hefur verið gert er að ég tók baðherbergið í bílskúrnum í nefið og breytti því í geymslu, henti baðkarinu út málaði gólf og veggi og setti upp flúrljós og hillukerfi. Svo tókum við Guðný til hendinni og röðuðum í nýju geymsluna og hentum ýmsu drasli sem safnast hefur upp í kjallaranum engum til gagns, það var af nógu að taka og endaði með því að þetta urðu þrjár fullar kerrur og ein ferð í Súbbanum í gámana ;). Sjálfsagt hefur þetta verið hvalreki á fjörur gámarottanna sem vonandi hafa getað nýtt eitthvað af þessu rusli. Nú við erum búin að panta hringstiga í forstofuna, en hann kemur til með að leysa af hólmi bráðarbyrgðarstigann sem settur var upp um árið, og eldvarnarhurð milli bílskúrs og kjallaraherbergis var líka pöntuð, svo þar bara að trekkja múrbrjótinn upp og snikka hur...

Í gær ruslaði ég svo öllu út úr bílskúrnum og grunnaði bílskúrsgólfið, svo fór ég og umfelgaði hjólið það verða líklega lítil not fyrir nagladekkin miðað við spána svo að þetta var tilvalin leikur í stöðunni, við Rúnar skelltum okkur svo aðeins á sandinn í gær og sigldum á fullu röri nokkrar ferðir þar. Við lentum svo í matarboð til Halla og Línu í gærkvöldi sem var alveg glimrandi gott, Lína ætlar að hjálpa Guðnýu eitthvað í kring um fermingarveisluna og voru þær eitthvað að spá í því ásamt öðru ;). Í morgun málaði ég svo bílskúrsgólfið, ég málaði hjólið inni svo að það verður líklega ekkert notað í dag. Læt þetta nægja í bili. Guð geymi ykkur.........................................

..::Endur-Skoðun::.. Hvað er að frétta, jú ég er búin að fara nokkrar ferðir í bæinn í vikunni og tengjast þrjár þeirra skoðun á bílnum. En á þriðjudaginn tjöruþvoði ég bílinn og skipti svo um perurnar í númeraljósinu sem sett var út á í skoðuninni í fyrra, það átti að skipta um perur við fyrsta tækifæri. Ég var að vísu búin að reyna við þetta en helv... skrúfurnar í þessu voru svo fastar að ég sló þessu á ársfrest, en nú var ekki til setunnar boðið og varð ég að þjösna þessu í sundur og skipta um perurnar, og skrúfurnar, því þær voru ekki til stórræða eftir brottvikninguna. Svo var brunað á glansandi drossíunni í bæinn í skoðun, það gekk bara ágætlega nema að stillingin á öðru framljósinu var eitthvað úti í skurði og dillaði ljósgeislinn í takt við hreyfingar bílsins. En skoðarinn var til í að sleppa mér með það nema eitthvað annað kæmi í ljós, og þá þurftu bremsuklossarnir endilega að vera nánast uppurnir. Þetta kostaði endurskoðun og græna miða á skrásetningarplöturnar :(.

Út af því hvað margar gerðir eru í boði af bremsuklossum í Subaru Impreza af þessari árgerð þá varð ég að bruna heim þar sem ég átti einn gamlan klossa frá síðustu skiptum. Svo var brunað ég aftur inn á Akureyri og keypti klossa, um kvöldið skipti ég svo um klossana og kippti ljósinu í liðinn í orðsins fyllstu merkingu, en það var úr liði og því var reddað. Á miðvikudagsmorgun var svo enn og aftur brunað í bæinn, annar í skoðun og auðvitað rann drossían í gegn án athugasemda ;). Minn bara nokkuð lukkulegur með skoðunina. Ég kíkti svo aðeins á netaverkstæðið hjá Hemma og tók stöðuna í þeim geira áður en ég brunaði heim á nýskoðuðum frúarbílnum.

Dagurinn í dag hefur verið án nokkurra ferðalaga, en ég fór og synti í 40min og skipti svo um bensíntank á vélhestinum sem bíður eftir frosti á skaflaskeifunum í bílskúrnum. Í kvöld leit svo Svanur vinur minn við í heimsókn og náðum við að rifja upp nokkra gamlar góðar sögur. Einn góður vinur okkar var að leysa af sem kokkur fyrir mörgum árum, hann hefur alltaf verið dugnaðarforkur þessi drengur og sjálfsagt hefur hann haft eitthvað annað að gera en að læra þegar stafsetningarkennslan fór fram á hans uppvaxtarárum. Það var oft athyglisvert það litla sem hann skrifaði, í þessu umrædda tilfelli hafði hann verið að skrifa kostlistann og á honum stóð “einn hriggur”, það var náttúrulega strax sett út á þetta og einhver spurði ekki ætlarðu að láta þetta fara svona frá þér? Minn maður leit á listann, greip svo blýantinn og strokaði út eitt g, nú stóð “einn hrigur” og allir ánægðir :). Áður en ég hætti þá vil ég benda ykkur á frétt á baggalút sem mér finnst ómissandi framhald af klámumræðunni...

..::Þar kom að því að ég fór niður úr ísnum ;);)::.. Smellti mér í Bjarmann í morgun og fyllti upp á heilunartankinn, kíkti svo á verkstæðið og höslaði Rúnar í að koma á ísinn á Hrísatjörninni eftir matinn. Eftir hádegið dró ég á mig dressið og startaði hjólinu, svo var rúllað niður á verkstæði, þar var Rúnar klár og ekkert að vanbúnaði að leggja í hann. Við stoppuðum örstutt í Olís þar sem eldsneyti var búnkerað og svo var geyst af stað. Það gerist ekki mikið flottara veðrið, sól og frostlaust ca 2°C hiti, ísinn var alveg dúndrandi fínn og þvílíkt grip. Við vorum búnir að taka úr okkur mesta hrollinn þegar Maggi bættist í hópinn og þandi um svellið með okkur meira og minna á afturhjólinu, hann er nokkuð lunkinn að halda hjólinu uppi á endanum.

Fljótlega þurfti svo Rúnar að fara svo við Maggi vorum eftir, við tókum smá sprett á ísnum á tjörninni og svo var stefnan sett á Svarfaðardalsána sem virtist vera nokkuð góð frá Árgerðisbrú og niður að hitaveiturörinu, en nýlega var búið að keyra þetta þvers og kruss á bíl. Við tókum nokkur rennsli þarna og það var þvílíkt gott að prjóna á ánni. En þetta var orðið ágætt og Maggi lagði af stað upp á flæðarnar en mér leist ekki nógu vel á það og ákvað að fara til baka. Ég var rétt komin af stað þegar ísinn gaf sig og ég lenti á svartakaf hehe, en sem betur fer var þetta ekki mjög djúpt kannski klofdjúpt. Þegar ég var búin að reisa hjólið upp þá kom Maggi og hjálpaði mér að koma hjólinu upp á ísinn, það gekk ágætlega en djö.... voru fæturnir á mér þungir þegar ég var að brölta upp á ísskörina. Nú var næst að koma hjólinu í gang, það var nú ekki alveg á því enda sjálfsagt búið að súpa örlítið af vatni inn á sig, en eftir að ég var búin að slíta lofthreinsarann af og ausa ísmolum og vatni ú...

En þetta fór nú allt ágætlega og sem betur fer var þetta ekki dýpra, en það fylgja öllu svona einhverjar fórnir, nýi fíni Samsung síminn minn drukknaði og hafa ítrekaðar lífgunartilraunir ekki borið árangur, það passaði ágætlega til því ég var nýlega búin að koma símaskránni inn og ekki búin að vista það á símkortið ;(. Sennilega hefur verndarengillinn minn passað upp á að fallið niður um ísinn var ekki hátt. Látum þetta nægja í bili. Munið svo að passa ykkur á ísnum hann er stundum þynnri en maður heldur ;).

X-factor , í kvöld var náttúrulega horft á þann mæta þátt og sitt sýndist hverjum um ágæti keppendanna, persónulega fannst mér þetta rétt val hjá Einari að senda Gylfa heim, en fleira verður að gera en gott þykir. Mér fannst aftur á móti færeyingurinn vera langbestur í kvöld og fékk hann mitt atkvæði, en mér þykja þær líka góðar stelpurnar í Gis og skil ekki alveg hversvegna þær lenda aftur og aftur í þessari aðstöðu. En hvað sem því líður þá er eins dauði annars brauð og nú þegar Gylfi er farin út þá styrkir það þá gömlu ;). En þótt ég hafi gaman að þessu þáttum þá raska þeir ekki mikið tilfinningunum hjá mér og ég er ekki í neinum vandræðum með að halda aftur af tárunum, ég lít frekar á þetta sem skemmtun og eitthvað til að hafa gaman af. Það hefur örugglega glatt marga í Fjáreyjum að þeir skyldu fá að horfa á þetta beint í kvöld, enda er fulltrúi þeirra þeim til sóma og það vita þeir. Á net flakki mínu fyrir nokkrum dögum rakst ég á þessa líka fínu fréttina í Færeyskum netfréttamiðl...

..:Klám hvað?::.. Er þetta ekki komið út í rugl? (sjá frétt á visir.is) Það virðist hægt að tengja orðið allan fjandann við klám, en að mínu mati finnst mér það nú frekar lýsa þeim best sjálfum sem mestu offari fara í þessu bulli. Hvað er það fólk að hugsa, og á hvað hefur fólk eiginlega verið að horfa. Ef ég hefði átt að vinna mér það til lífs að tengja barnið á forsíðu þessa bæklings við einhverja þekkta líkamstöðu, þá hefði ég sjálfsagt orðið að velja dauðann, því hvorki er þekking mín á klámmyndastellingum né hugmyndaflug er komið svo langt á þróunarbrautinni að mér hefði dottið þessi samlíking í hug. Mér hefur alltaf þótt það vera mannkostir ef fólk hefur séð lífið frá ýmsum sjónarhornum, og sem betur fer erum við ekki öll eins, en þegar fólk festist í gír, hvort sem það er nú klám umhverfisvermd trúarofstæki eða Guð má vita hvað, þá flokka ég það undir lesti sem fólk væri betur án komið.